Kavita

Add Your Entry

એમ ક્યાં કીધું કે જીવન સાવ સહેલું જોઈએ,

જે થવાનું હોય એ પહેલેથી કહેવું જોઈએ !

કોઈ રડતું હોય એ જોવું કંઈ સહેલું નથી,
એને જોવાં માટે ઈશ્વરનું કલેજું જોઈએ.

એટલા ધનવાન હોવું તું કરી દે ફરજિયાત,
વાણીમાં સંસ્કારનું કોઈ ઘરેણું જોઈએ.

એ જુએ મારા કવચ કુંડળ ને તાકી તાકી ને,
યાર સીધે સીધું બોલી નાખને શું જોઈએ !

આપણા જીવનના રસ્તા પર ખૂણે ઊભા રહી,
આવનારા ને જનારા ના પગેરું જોઈએ.

– ભાવેશ ભટ્ટ

Author: Gurjar Upendra Read More...

આ ડગર ભૂલ્યા પછી વાતો થવાની,
ને નજર ચૂક્યા પછી વાતો થવાની.

હાજરીમાં કોઈ ક્યાં બોલી શકે છે,
આપણે ઊઠ્યા પછી વાતો થવાની.

કોઈ જોતું હોય ના એવી જગા પર,
આ કદમ મૂક્યા પછી વાતો થવાની.

રોજ રસ્તે આમ તો જાતો હતો પણ,
માર્ગનું પૂછ્યા પછી વાતો થવાની.

યાર, ઘરમાં દીવડો મૂક્યો છતાં પણ,
ત્યાં તમસ ઘૂંટ્યા પછી વાતો થવાની.

 

Author: Gurjar Upendra Read More...

તારી આંખનો અફીણી, તારા બોલનો બંધાણી

તારા રૂપની પૂનમનો પાગલ એકલો

 

હે આજ પીઉં દરશનનું અમૃત, કાલ કસુંબલ કાવો

તાલ પુરાવે દિલની ધડકન, પ્રીત બજાવે પાવો

તારી મસ્તીનો મતવાલો આશક એકલો

હે તારા રૂપની પૂનમનો પાગલ એકલો

 

તારી આંખનો અફીણી, તારા બોલનો બંધાણી

તારા રૂપની પૂનમનો પાગલ એકલો

 

પાંખોની પરખે પરબડી, આંખો જુએ પીયાવો

અદલ બદલ તનમનની મોસમ, ચાતકનો ચકરાવો

તારા રંગ નગરનો રસિયો નાગર એકલો

હે તારા રૂપની પૂનમનો પાગલ એકલો

 

તારી આંખનો અફીણી, તારા બોલનો બંધાણી

તારા રૂપની પૂનમનો પાગલ એકલો

 

ધીમી ધીમી પગલી તારી  ધીમી કૈંક અદાઓ

કમર કરે છે લચક અનોખી રૂપ તણાં લટકાઓ

તારી અલબેલી એ ચાલનો ચાહક એકલો

હે તારા રૂપની પૂનમનો પાગલ એકલો

 

તારી આંખનો અફીણી, તારા બોલનો બંધાણી

તારા રૂપની પૂનમનો પાગલ એકલો

 

તું કામણગારી રાધા ને હું કાનો બંસીવાળો

તું ચંપાવરણી કૃષ્ણકળી, હું કામણગારો કાનો

તારા ગાલની લાલીનો ગ્રાહક એકલો

હે તારા રૂપની પૂનમનો પાગલ એકલો

 

તારી આંખનો અફીણી, તારા બોલનો બંધાણી

તારા રૂપની પૂનમનો પાગલ એકલો

 

રૂપ જાય આગળથી પાછળ, જાય જુવાની વીતી

પ્રીતવાવડી સદા છલકતી, જાય જિંદગી પીતી

તારા હસમુખડાં ઝીલું છું ઘાયલ એકલો

હે  તારા રૂપની પૂનમનો પાગલ એકલો

 

તારી આંખનો અફીણી, તારા બોલનો બંધાણી

તારા રૂપની પૂનમનો પાગલ એકલો

 

ઠરી ગયાં કામણના દીપક, નવાં નૂરનો નાતો

ઝલક ગઈ મન પામરતાની, નવી આરતી ગાતો

તારી પાનીને પગરસ્તે ચાલું એકલો

હે તારા રૂપની પૂનમનો પાગલ એકલો

 

તારી આંખનો અફીણી, તારા બોલનો બંધાણી

તારા રૂપની પૂનમનો પાગલ એકલો

 

સ્વર: દિલીપ ધોળકીયા

ગીત: વેણીભાઈ પુરોહિત

સંગીત: અજિત મરચન્ટ અને દિલીપ ધોળકીયા

ચિત્રપટ: દીવાદાંડી (૧૯૫૦)

(ગીત સાંભળો :  

http://mavjibhai.com/MadhurGeeto/009_tariankhno.htm

Author: Gurjar Upendra Read More...

આવી એણે મદભર નયણે કહ્યું કાનમાં શુ એવું?

હું ને તું; તું ને હું.

આવી એણે મદભર નયણે કહ્યું કાનમાં શુ એવું?
હું ને તું; તું ને હું.

હૈયું ઘેલું હાથ રહે ના રહે ના મારા કે'ણે,
ઘડી ઘડી એ ગૂંજી રહે છે એક જ તારા વેણે.

શેણે? તું એ હું,
હું એ તું, તું એ હું.

આવી એણે મદભર નયણે કહ્યું કાનમાં શુ એવું?
હું ને તું; તું ને હું.

ઘટા પ્રેમની છટાભરી જો સજની આજ છવાઈ,
મનના મોરો ટહુકી દેતા આજે એક વધાઈ.

તું એ હું, હું એ તું,
તું એ હું.

આવી એણે મદભર નયણે કહ્યું કાનમાં શુ એવું?
હું ને તું; તું ને હું.

પ્રીત તણી ઓ પ્રીતમ તારી મધુરી વીણા વાગી,
ઝનનઝનન મુજ ઝાંઝર ઝમક્યાં દિલડું બોલે જાગી.

શું? તું એ હું,
હું એ તું, તું એ હું.

આવી એણે મદભર નયણે કહ્યું કાનમાં શુ એવું?
હું ને તું; તું ને હું.

• પ્રહ્લાદ પારેખ

ક્લીક કરો અને સાંભળોઃ

http://mavjibhai.com/madhurGeeto_two/286_aaviene.htm

 

Author: Gurjar Upendra Read More...

એ રીતે સાથે દે છે સદા એક ક્ષણના દોસ્ત,

પગલાં બની ગયાં છે તમારા ચરણનાં દોસ્ત.

ઊભરો રહે ન દિલમાં ન બદનામીઓનો ડર,
શોધું છું ભેદ કહેવાને નબળાં સ્મરણના દોસ્ત.

એના લીધે નિભાવી લીધી કંઈક દોસ્તી,
બાકી અમે અહીં હતા બસ એક જણના દોસ્ત.

હિંમતની એ ઊણપ હો કે કિસ્મતની વાત હો,
ખાબોચિયામાં તર મેં દીઠા છે ઝરણનાં દોસ્ત.

એનું થવાનું એ જ કે પટકાશે આમતેમ,
દરિયાનાં મોજેમોજાં થયાં છે તરણનાં દોસ્ત.

તારા લીધે ખુવાર થયો છું જહાનમાં,
ઢાંકણ એ ભેદનાં છે બૂરા આચરણના દોસ્ત.

ઓ દોસ્ત, કોઈ દોસ્તનો એમાં નથી કસૂર,
વાતાવરણ બનાવે છે વાતાવરણના દોસ્ત.

જઈને વતનમાં એટલું જોયું અમે ‘મરીઝ’,
મોટા બની ગયા છે બધા બાળપણના દોસ્ત.
(‘મૈત્રીનો સૂર્ય’ પુસ્તકમાંથી)

Author: Gurjar Upendra Read More...

રાજા કહો કહો કે આમ-માણસ બેઉ જણ બેહાલ છે

ખભ્ભા ઉપર જે ઊંચક્યું છે બેગ એ વેતાલ છે.

કિરણો વડે ચાદર બની બ્રહ્માંડ એને સૌ કહે
આવી રીતે પણ એક વિરાટ અવતારમાં ગોપાલ છે.

અસ્તિત્વ વાવ્યું જેમણે ખેડૂત એ કેવો હશે !
નોખા ઊગે છે ફળ સતત, નોખો નિરંતર ફાલ છે.

મારી તરફ આવી રીતે છુટ્ટી નજર ફેંકો નહીં
મેં આંખ પર પ્‍હેર્યા છે એ ચશ્માં નથી, પણ ઢાલ છે.

આઘાત એવો આપ કે તત્કાલ પરસેવો વળે
ઠંડી બહુ લાગી રહી છે, ને આ ટૂંકી શાલ છે.

હું ક્રોસ છું ને ઇશુ મારી સ્વીકારો પ્રાર્થના
અવતાર લેતા નહીં હવે આજે ભલે નાતાલ છે.

કુલદીપના આંસુ હવે સેકન્ડમાં લૂછાય છે
તડકો નથી જાણે સૂરજના હાથમાં રૂમાલ છે.

- કુલદીપ કારિયા 

Author: Gurjar Upendra Read More...

ફૂટપાથે સૂતેલા ભૂખ્યા કોઈ બાળકની આંખો પર

ધ્યાન કદી દેજો
છાતીના મૂળ સુધી એની એ ભૂખ પછી તમને
ના વાગે તો કહેજો

ફૂટપાથે સૂતેલા ભૂખ્યા કોઈ બાળકની આંખો પર
ધ્યાન કદી દેજો
ઈંટ અને સિમેન્ટે ભીંતો બંધાય એમ લાગણીઓ
થોડી બંધાય છે

ભીંતેથી પોપડા ખરે ને એમ રોજ અહીં માણસ પણ
જર્જરિત થાય છે
ડામરના રસ્તા પર કાળીધબ ઈચ્છા ના એકલા
નિસાસા ના લેજો

ફૂટપાથે સૂતેલા ભૂખ્યા કોઈ બાળકની આંખો પર
ધ્યાન કદી દેજો
સૂરજ ડૂબે ને પછી ટળવળતી સાંજ રોજ ટોળે વળી
ને મૂંઝાય છે
અહીં નાનકડા રોટાલાનો ટુકડો પણા માણસની આંખોનું
સપનું થઈ જાય છે

કાચ સમી જિંદગીને સાચવતા માણસના આંસુની
ધાર કદી સહેજો
છાતીના મૂળ સુધી એની તરસ પછી તમને
ના વાગે તો કહેજો

– તેજસ દવે

Author: Gurjar Upendra Read More...

સારા અને નરસા પ્રસંગે જાન છે મિત્રો
ઈશ્વર સ્વરૂપે અવતર્યું વરદાન છે મિત્રો

મક્કમ રહેલી વાત ઉપર છેક છેવટે-
ઓસરવું ઊતરી જાય એ ફરમાન છે મિત્રો,

જ્યારે તમે હળવા થઈને હોશમાં હશો,
ત્યારે બચેલી આબરૂનું ભાન છે મિત્રો.

એવા ને એવા આપણે સુદામા થઈ જીવ્યા
એવા ને એવા આંખ, હૈયું કાન છે મિત્રો

અમથી નવાબી હોય ના સંબંધની કદી-
મળ્યાને તે દિવસથી જાજરમાન છે મિત્રો…

(અંકિત ત્રિવેદી સંકલિત ‘જીવનના હકારનો ફોટોગ્રાફ’ પુસ્તકમાંથી)

Author: Gurjar Upendra Read More...

Most Viewed Kavita

Most Viewed Author