૧. ઊંધે પગે બેસવું = પગ ઊંધા વાળીને બેસવું.
૨. એક પગે થવું = અધીરું થવું.
૩. ચારે પગે = તૈયાર થયેલું.
૪. ધરતી ઉપર પગ ન રાખવા = (૧) આનંદથી ધીમે ઊછળવું; બહુ પ્રસન્ન થવું. (૨) બહુ અભિમન આવી જવું.
૫. પગ અડાડવો = વચમાં પડવું.
૬. પગ આગળ ધરવો = આગળ જવું; વધવું.
૭. પગ આડોઅવળો થવો = અનીતિનું કામ થવું.
૮. પગ આવવા-થવા = (૧) અદૃશ્ય થવું; જતું રહેવું. (૨) ઊપડી જવું; ઊચકાઈ જવું. (૩) પોતાની ઉપર આધાર રાખી કાર્ય કરવાની શક્તિ આવવી; સ્વાશ્રયે નભવાની શક્તિ આવવી. (૪) બાળકે ચાલતાં શીખવું; બાલકે ટટ્ટાર ઊભા રહી ચાલવા માંડવું; ચાલવાની શક્તિ આવવી. (૫) મહાવરો થવો. (૬) હદ ઉપરાંત જવું; મર્યાદા બહાર જવું.
૯. પગ ઉઠાવવા-ઉઠાવવો-ઉપાડવા-ઉપાડવો = (૧) ઉતાવળે ચાલવું. (૨) ચાલવાનું શરૂ કરવું. (૩) નીકળી જવું; ખસી જવું. (૪) પગ ઊંચો લેવો.
૧૦. પગ ઉઠાવીને-ઉપાડીને ચાલવું= ઉતાવળે પગે ચલાવું.
૧૧. પગ ઉપર પગ ચડાવવા-ચડાવવો = (૧) આળસુપણે કે નફકરા થઈને બેસવું. (૨) કોઈની નકલ કરવી; કોઈ પ્રમાણે ચાલવું.
૧૨. પગ ઉપાડવો-ઊચકવો-ચલાવવો = ઉતાવળા ચાલવું; જલદી ચાલવું.
૧૩. પગ ઊખડવો = (૧) તણાઈ જવું. (૨) લશ્કરનું નાસી જવું. (૩) સમતોલપણું ખોવું.
૧૪. પગ ઊતરવો = સાંધામાંથી પગ ચસકી જવો; પગ ખડી જવો.
૧૫. પગ ઊપડવો = (૧) પગમાં ચાલવાની શક્તિ હોવી. (૨) હિંમત આવવી; છાતી ચાલવી.
૧૬. પગ ઊંચા નીચા થવા-ઊંચો નીચો થવો = ગર્ભ રહેવો.
૧૭. પગ ઊંચો નીચો પડવો= (૧) આબરૂ ગુમાવવી. (૨) છિનાળુ કરવું; મૈથુન કરવું. (૩) છૂપો લાભ મેળવવો.
૧૮. પગ કપાઈ જવો = (૧) આવવું જવું બંધ થવું. (૨) પગના બે ભાગ થઈ જવા; પગનો અમુક ભાગ કંઈ લાગવાથી જુદો થઈ જવો.
૧૯. પગ કરવા = જતું રહેવું; અદૃશ્ય થવું; ખસવું.
૨૦. પગ કહ્યું કરતા નથી = અતિશય થાક લાગ્યો છે; આગળ જરા પણ વધી શકાય તેમ નથી.
૨૧. પગ કાઢવો = (૧) આગળ આવવું. (૨) ખસી જવું; તજી દેવું; છૂટા થવું; અમુક કામમાંથી મુક્ત થવું. (૩) ખસેડવું; દૂર કરવું. (૪) ચલણ બંધ કરવું; જોર ટાળવું. (૫) જવું આવવું બંધ કરવું; અવરજવર બંધ કરવો. (૬) નાબૂદ કરવું; નાશ કરવું. (૭) પોતાનો ખરાબ સ્વભાવ બતાવવો. (૮) મુશ્કેલીમાંથી નીકળી જવું. (૯) સત્તા છીનવી લેવી.
૨૨. પગ ગડવો = (૧) દૃઢતા રહેવી; વિચલિત થવાની અવસ્થા ન રહેવી. (૨) પગ ઠેરવો; સ્થિરપણે ઊભા રહેવું. (૩) મજબૂત થવું. જામી જવું.
૨૩. પગ ઘસવા = (૧) નકામી મહેનત કરવી. (૨) પગનાં તળિયાંને માલિશ કરવાં; તાવમાં કાંસાના વાટકાથી પગને તળિયે મીઠું ને ઘી ઘસવાં.
૨૪. પગ ઘસાઈ જવા = થાકી જવું.
૨૫. પગ ઘાલવો = (૧) ઘરમાં કે કુટુંબમાં પગપેસારો કરવો; યત્નપૂર્વક કોઈ બાબતમાં ઘરમાં કે કુટુંબમાં ઘૂસી રહેવું. (૨) દાખલ થવું; વચ્ચે ઘૂસવું; પેસવું. (૩) માથું મારવું; હેતુપૂર્વક કામમાં વચ્ચે પડવું.
૨૬. પગ ચલાવવા = ઉતાવળે ચાલવું.
૨૭. પગ ચંપાવો = પગ ગંદામાં પડવો.
૨૮. પગ ચાલવા = પગમાં બળ હોવું.
૨૯. પગ ચાંપવા = પગચંપી કરવી.
૩૦. પગ ચૂંથાવા = પગે ગોટલા બાઝવા.
૩૧. પગ છૂટો કરવો = (૧) થોડું થોડું ચાલવાની ટેવ પાડવી; ચાલવાની કસરત લેવી; થોડું થોડું ફરી આવવું. (૨) સાંકડમાંથી મુક્ત થવું. (૩) હરવું ફરવું; ચાલીને પગનો અકડાટ દૂર કરવો.
૩૨. પગ છૂટો થવો = (૧) મૃત પતિની વરસી વળાયા પછી વિધવાને ઘર બહાર નીકળવાની છૂટ થવી. (૨) હરવાફરવાથી પગનો અકડાટ દૂર થવો.
૩૩. પગ જમાવવો = સ્થિર થવું; પગ ઠેરવવો.
૩૪. પગ જામવો-ટીકવો = (૧) દૃઢતા રહેવી. (૨) પગ ઠરવો; સ્થિરપણે ઊભા રહેવું. (૩) મજબૂત થવું; જામી જવું.
૩૫. પગ જોઈને પાથરણું તાણવું = ગજા પ્રમાણે કામ કરવું.
૩૬. પગ જોવો = પરીક્ષા કરવી.
૩૭. પગ ટકવો-ઠરવો = (૧) ખોટી થવું; ઝાઝી વાર રહેવું. (૨) જારી રહેવું. (૩) સ્થિર, દૃઢ કે કાયમ થઈ રહેવું; જંપીને સ્થિર મને રહેવું; એક જગ્યાએ ઠરી ઠામ નિરાંત વાળી ઝાઝી વાર બેસી રહેવું.
૩૮. પગ ટકાવવો = પગ જમાવવો..
૩૯. પગ ટકાવી રાખવો = (૧) જવું આવવું જારી રાખવું; (૨) નભ્યા કરવું. (૩) સબૂરી રાખવી; ધીરૂં પડવું.
૪૦. પગ ટટ્ટુ કરવા = પગે ચાલવું.
૪૧. પગ ટાળવા-ટાળવો = (૧) કોઈનો કોઈને ત્યાં થતો અવરજવર બંધ કરાવવો. (૨) ચલણ બંધ કરવું; જોર કે સત્તા જાય એમ કરવું. (૩) પગ દે નહિ એમ ખસેડવું; દૂર કરવું.
૪૨. પગ ઠરવો-ઠેરવો = (૧) પગ જામવો. (૨) સ્થિર કે દૃઢ રહેવું; સ્વસ્થ થઈ રહેવું.
૪૩. પગ ઠોકવો = (૧) કંટાળો બતાવવો. (૨) દૃઢતાથી ઊભા રહેવું.
૪૪. પગ ઠોકીને ઊભા રહેવું = લડવાને આતુર થઈ રહેવું; મક્કમતાથી સામે થવા તૈયાર રહેવું.
૪૫. પગ ડગમગવો-ડગવો = (૧) દૃઢ ન રહેવું. (૨) ધ્રૂજવું. (૩) પગ સ્થિર ન રહેવો. (૪) લપસવું. (૫) હારી જવું.
૪૬. પગ ઢસડવા-ઢસરડવા = (૧) પગ ખેંચવા. (૨) પરાણે ચાલવું.
૪૭. પગ ઢાંકવા = પગે ઓઢાડવું.
૪૮. પગ ઢીલા પડવા = નાહિંમત કે નુરુત્સાહ થઈ જવું.
૪૯. પગ તળાંસવા = (૧) ખુશામદ કરવી. (૨) તાવ આવ્યો હોય અને પગમાં કળતર થતી હોય ત્યારે પગને તળિયે મીઠું તથા ઘી ઘસવાં; પગના તળિયાં ઉપર હાથ ફેરવવા.
૫૦.પગ તળે ઘસી નાખવું = (૧) માર્ગથી અતિ પરિચિત હોવું. (૨) વારંવાર અવરજવર કે પરિચયથી તુચ્છ ગણવું.
૫૧. પગ તળે ઘાલવું = (૧) દબાવી બેસવું. (૨) દાબમાં લેવું. (૩) નીચું પાડી દેવું; તુચ્છ ગણવું. (૪) પોતાની સત્તા નીચે લાવવું.
૫૨. પગ તળે ચીપવુ = (૧) એડી નીચે દબાવવું. (૨) વશ કરવું.
૫૩. પગ તળે બળતું ને પારકી વાત કરવી = પોતાની નબળાઇ ધ્યાનમાં ન લેવી.
૫૪. પગ તળે બળતું હોવું = પોતામાં જ દોષ હોવો; પોતાનો જ દોષ હોવા છતાં બીજાનો દોષ કાઢવો.
૫૫. પગ તળે બળે અને લંકા ઓલવવા જાય = પોતાનું કામ બગડી જતું હોય તોપણ બીજાનું સુધારવા જવું.
૫૬. પગ તળે મોત હોવું = મોત નજીક હોવું; કાળને આવતાં વાર ન લાગવી.
૫૭. પગ તળે વાટી ઘસી નાખવું = વારંવાર આવજા ઘણા અનુભવી બનવું.
૫૮. પગ તળે વાટી નાખવું = (૧) તુચ્છ ગણવું. (૨) સુપરિચિત કરી લેવું.
૫૯. પગ તળેની માટી નીકળવી = મૂંઝાઈને ભાન ભૂલી જવું.
૬૦. પગ તળેની વાટ = પરિચિત રસ્તો; જાણીતો માર્ગ.
૬૧. પગ તૂટવા = કળતર થવી.
૬૨. પગ તોડવા = (૧) નકામા આંટાફેરા કરવા. (૨) બહુ ચાલીને પગને થકવવા. (૩) બહુ પ્રયત્ન કરવો.
૬૩. પગ તોડાવવા = (૧) નકામા ફેરા ખવરાવવા. (૨) પગ દબાવરાવવા; પગચંપી કરાવવી. (૩) બહુ ચલાવીને પગ થકવાવવા. (૪) બહુ પ્રયત્ન કરાવવો.
૬૪. પગ થકવવા = (૧) કંટાળે એમ કરવું. (૨) થાકી જાય એમ કરવું.
૬૫. પગ થર થર થવા = પગ કાંપવા.
૬૬. પગ થવા = (૧) ઊપડી જવું; જતા રહેવું; ખસવા માંડવું. (૨) જાણવાને શકિમાન હોવું. (૩) પગ થયા હોય એમ ચાલવા માંડવું. (૪) મહાવરો થવો; શક્તિ કે સમજ આવવા માંડવી. (૫) સત્તા મેળવવી. (૬) હદ ઉપરાંત જવું; મર્યાદા બહાર જવું.
૬૭. પગ થવું = (૧) ખલાસ થવું. (૨) નાસી જવું; ચાલ્યા જવું. (૩) પાયમાલ થવું .
૬૮.પગ થવો-પેસવો = (૧) આવતું જતું થવું; અવરજવર થવો; પ્રવેશ મળવો. (૨) ઘૂસવું; દાખલ થવું; ચલણ થવું. (૩) લાગવગ ચાલવી.
૬૯. પગ થાકવા = (૧) નિરુત્સાહ બનવું; કંટાળી જવું; નિરાશ થવું. (૨) હારી જવું.
૭૦. પગ દબાવવા = (૧) થાક ઉતારવા પગચંપી કરાવવી. (૨) સેવા કરાવવી.
૭૧. પગ દાબવા = (૧) થાક ઉતારવા પગચંપી કરવી. (૨) સેવા કરવી.
૭૨. પગ દેવો = (૧) કોઈ વાત ન કરવા દેવી. (૨) દાખલ થવું; પ્રવેશ કરવો.
૭૩. પગ ધરવો = (૧) આગળ પગ મૂકવો; આગળ વધવું. (૨) પ્રવૃત્ત થવું. (૩) શરૂ કરવું.
૭૪. પગ ધોઈ-ધોઈને પીવા = (૧) પૂજ્ય તરીકે માનવું; પૂજ્યબુદ્ધિભાવ રાખવો. (૨) બહુ આદરથી પૂજા કરવી. (૩) બહુ ઉપકાર માનવો; અભારી રહેવું. (૪) માન આપવું..
૭૫. પગ ધોઈ-ધોઈને પીવા જેવું = પવિત્ર; સંત જેવું જીવન જીવનારૂં; પૂજ્ય.
૭૬. પગ ન-નહિ ઊપડવા-ઊપડવો = (૧) કોઇ ઠેકાણે જવાને દિલ ન ચાલવું. (૨) શરમાવું; લજવાવું; સંકોચ થવો.
૭૭. પગ નાખવો = કોઇ વાત ન થવા દેવી.
૭૮. પગ નીકળી જવો = (૧) જવું આવવું બંધ થવું; દૂર થવું; ચલણ બંધ થવું. (૨) પરિચય અને અવરજવર કોઈ કારણસર બંધ પડી જવો; જવા જેવું નહિ રહેવું.
૭૯. પગ નીચે ગડકી જવું = હારવું; શરણ થવું.
૮૦. પગ નીચેથી નીકળવું = વારંવાર આવજા કરી ઘણા અનુભવી થવું.
૮૧. પગ પકડવા-પકડવો = (૧) બહુ આજીજી કરવી. (૨) માનની લાગણીથી નમન કરવું; આદરપૂર્વક પ્રણામ કરવા. (૩) વિનંતિ કરીને કોઈને ક્યાંય જતાં અટકાવવો.
૮૨. પગ પખાળવા = (૧) પગ ધોવા. (૨) લગ્નસમારંભમાં વેવાઈ જમવા આવે ત્યારે મોટેરાનાં ચરણો ધોઈ પૂજન કરવું.
૮૩. પગ પર-પગમાં કુહાડો મારવો = હિત બગાડવું ; પોતાને જ ગેરલાભ થાય તેમ કરવું.
૮૪. પગ પર પગ ચડાવવા-ચડાવી બેસવું = (૧) ધંધા વિનાનું રહેવું; નિરુદ્યમી થઈને બેસી રહેવું. (૨) નિરાંતે બેસવું; કામ કરવાને નાખુશ થઈને આળસુ બેસવું; આરામથી બેસી રહેવું; કામકાજની કાળજી નહિ રાખતાં આરામથી રહેવું અને ગપ્પાં માર્યા કરવાં; નિષ્કાળજીથી ચિંતા વગરની સ્થિતિમાં બેસી રહેવું.
૮૫. પગ પર-પગમાં માથું મૂકવું = (૧) કોઈની સત્તામાં રહેવું. (૨) શરણે જવું; આશરો માગવો.
૮૬. પગ પસારવો = (૧) આરામથી પડવું કે સૂવું. (૨) ગુજરી જવું. (૩) પગ લાંબા કરવા. (૪) સત્તા જમાવવી.
૮૭. પગ પાછા પડવા = (૧) જવાને દિલ નહિ ચાલવું; જવાને ભાવ નહિ થવો. (૨) શરમાવું. (૩) હારવું; નાસીપાસ થવું. (૪) હિંમત ન ચાલવી; આંચકો ખાવો.
૮૮. પગ પાણી પાણી થઈ જવા = (૧) નાઉમેદીથી ઢીલા થઈ જવું. (૨) પગમાં ખૂબ અશક્તિ લાગવી; ઊભું ન રહેવાવું. (૩) ભય કે કોઈ કારણથી પગ ઢીલા થઈ જવા (૪) હિંમત જતી રહેવી; ઊભું ન રહી શકાવું.
૮૯. પગ પાતાળમાં-પેટમાં હોવા = (૧) પ્રપંચી હોવું; બહાર ન દેખાય પણ કપટી કે પહોંચેલ હોવું. (૨) મૂળ ઊંડાં હોવાં.
૯૦. પગ પાસે ઝાડુ કાઢવું = ટૂંકી દૃષ્ટિ રાખવી.
૯૧. પગ પીટવા = (૧) પગ પછાડવા. (૨) પગ પછાડીને મરી જવું. (૩) ફાંફાં મારવાં.
૯૨. પગ પૂજવા = (૧) ઉપકાર માનવો. (૨) પગની પૂજા કરવી; પગ ધોઈને પીવા. (૩) બહુ આદરસત્કાર કરવો.
૯૩. પગ પેસાડવો = (૧) પગ ઘાલવો. (૨) સત્તા જામવી; કાબૂ બેસવો.
૯૪. પગ ફૂલવા = (૧) થાકી જવું. (૨) મૂંઝાઈ જવું.
૯૫. પગ ફેરવવો = પ્રસૂતિ આવ્યા પછી સ્ત્રીનું માવતરે જવું.
૯૬. પગ ફેલાવીને સૂવું = (૧) ચિંતા વગર સૂવું. (૨) પગ પહોળા કરીને સૂવું.
૯૭. પગ બાંધીને રહેવું = (૧) નિરાંત વાળીને લાંબા વખત સુધી ટકી રહેવું; એક જગ્યાએ ટકીને રહેવું; પગ ટકાવીને રહેવું. (૨) સુખદુ:ખને નહિ ગણકારતાં દૃધ અને એક સ્થિર રહેવું; દૃઢતાથી અમુક એક સ્થાનમાં રહ્યા કરવું.
૯૮.પગ ભરાઈ જવા = થાકી જવું.
૯૯. પગ ભાગવા-ભાંગવા = (૧) છેવટ સુધી ન પહોંચતાં વચમાં અટકી પડવું. (૨) નિરાશ થવું; આશાભંગ થવું; નાઉમેદ થવું. (૩) પગે અશક્તિ આવવી. કોઈ માણસ ધીમે ચાલતો હોય ત્યારે ધીમા માણસને આમ કહેવાય છે. (૪) બળ તોડી નાખવું; હરાવવું; આગળ વધવાનું જોર તોડી નાખવું. (૫) લંગડું કરવું.
૧૦૦. પગ ભાગી-ભાંગી નાખવા = (૧) નાઉમેદ કરવું. (૨) બળ તોડી નાખવું; હરાવવું . (૩) લંગડું કરવું.
૧૦૧. પગ ભાગી-ભાંગી બેસવું = (૧) નિરાશ થઈ કાંઈ બનશે નહિ એમ આગળથી જ માની લઈ હતાશ થવું; આશાભંગ થવું. (૨) પગનું હાડકું તૂટી જવું.
૧૦૨. પગ ભારે થવા-થવો = (૧) જવાને દિલ નહિ ચાલવું; એક વાર ન જવાયું એટલે ફરીને જતાં શરમ આવવી; આશંકાવું; મહાવરો મૂકી દીધાથી આંચકો ખાવો; જવાની હિંમત જતી રહેવી; પગ પાછો પડવો; સંકોચાવું; જતાં સં કોચ થવો. (૨) ભારેવગા થવું; ગર્ભ રહેવો.
૧૦૩. પગ માંડવો = (૧) આગળ ચાલવું; ધપવું. (૨) ઘૂમવું; દાખલ થવું. (૩) ઠરીને ઊભા રહેવું. (૪) ધંધામાં પગપેસારો કરવો. (૫) નિરાંત ધરવી. (૬) પેસારો કરવો. (૭) શરૂઆત કરવી; પગ ધરવો; આરંભ કરવો. (૮) હા પાડવી.
૧૦૪. પગ મૂકવો = (૧) ઊતરવું. (૨) દાખલ થવું.
૧૦૫. પગ મેળવવા = (૧) એક જ વખતે સમૂહમાં પગ ઊપાડવા. (૨) બંને પગની એડી ભેગી ને ફણા છૂટા રાખી કસરતમાં સિપાઈની જેમ ઊભા રહેવું.
૧૦૬. પગ મોકળા કરવા = પગ છૂટા કરવા.
૧૦૭. પગ મોડવા = (૧) અટકાવવું. (૨) નબળું કરવું. (૩) નાઉમેદ કરવું; ભાંગી પાડવું. (૪) બગાડવું.
૧૦૮. પગ રહી જવા = પગ થાકીને અશક્ત બની જવા.
૧૦૯. પગ રાખવો = (૧) પગ આગળ મૂકવો; આગળ વધવું. (૨) શરૂ કરવું. (૩) સદંતર ત્યાગ ન કરવો.
૧૧૦. પગ વચમાં હોવો = (૧) જોખમદાર હોવું. (૨) જોખમદાર હોવું. (૩) ભાગ લેવો.
૧૧૧. પગ વધારવો = (૧) અધિકાર વધારવો; ધીરે ધીરે સત્તા વધારવી. (૨) આગેવાની લેવી. (૩) કોઈની હદમાં જવું. (૪) ઘૂમણ કે લાગવગા વધારવાં. (૫) ચાલવામાં ઉતાવળ કરવી. (૬) ધીરે ધીરે રોકાણ કરવા માંડવું. (૭) હિંમતભેર આગળ ધસવું.
૧૧૨. પગ વળવો = (૧) પગનું આમતેમ ફરવું. (૨) બીજા તરફ જવું અથવા જવાની વૃત્તિ થવી.
૧૧૩. પગ વાળવો = (૧) નિરાંતે થાક ખાવો; વિસામો લેવો; આરામ લેવો. (૨) પરવારવું; કામથી ફારગ થઈ આરામ લેવા બેસવું.
૧૧૪. પગ વાળી-વાળીને બેસવું = નિવૃત્તિ લેવી; જંપવું; નવરા થઈ આરામ લેવો.
૧૧૫. પગ વાળી-વાળીને બેસવા ન પામવું = (૧) કામમાં હોવું. (૨) ખૂબ દોડાદોડ થવી; બેસવાનો વખત ન મળવો.
૧૧૬. પગ સરસ કરવા = પગ ધોઈ નાખવા; પગ સાફ કરવા.
૧૧૭. પગ સંકોડવા = પગ ટૂંકા કરવા; પગ ફેલાયેલા ન રાખવા.
૧૧૮. પગથી તે માથા લગી-સુધી = નખથી શિખા સુધી; આખે શરીરે; હાડોહાડ; સર્વાંગ.
૧૧૯. પગની આગ-ઝાળ માથે જવી = ઘણું જ ગુસ્સે થવું; સર્વાંગે ક્રોધ વ્યાપવો.
૧૨૦. પગની ચળ-ચેળ ભાગવી-ભાંગવી = ચાલવા ખાતર ચાલવું; ફોગટ ફેરો ખાવો; ધરમનો ધક્કો ખાવો.
૧૨૧. પગની પનોતી ઉતારવી = લાંબો ફેરો મારવા છતાં કામ ન થવું.
૧૨૨. પગની મંદી ઘસાઈ ન જવી = કાંઈ બગડી ન જવું. જ્યારે કોઈ માણસ ઊડીને ક્યાંય જવાનું અથવા કાંઈ ચીંધ્યું કામ કરતો ન હોય ત્યારે વ્યંગમાં આમ બોલાય છે.
૧૨૩. પગનું આખું-ભાંગેલું = ચાલવાના કંટાળાવાળું; પગનું ભાંગલું; ચાલવાને આળસુ.
૧૨૪. પગનું ખરૂં-સબધું-સબળું-સાચું = મજબૂત પગવાળું; ખૂબ ચાલી શકે તેવું.
૧૨૫. પગનું ભાંગલું = કામ કરવાને ખુશી નહિ બતાવનારૂં.
૧૨૬. પગનું માથે ને માથાનું પગે પહેરવું = ઊંધુંચતું કરવું.
૧૨૭. પગનું સબળું = સશક્ત.
૧૨૮. પગનું સાચું = કામ કરવાને ખુશી.
૧૨૯. પગને તળિયે ઘસી નાખવું = ન લેખવવું; તુચ્છ ગણી કાઢવું; ન ગણકારવું.
૧૩૦. પગમાં ચક્કર હોવું = હમેશા રખડતાં રહેવું.
૧૩૧. પગમાં બળવું ને ડુંગરે ચડવું = દુ:ખમાં પણ આગળ વધવું.
૧૩૨. પગમાં બેડી પડવી = કોઈ જાતના બંધન કે જંજાળમાં ફસાવું.
૧૩૩. પગમાં માથું નાખવું-મૂકવું = (૧) પગે પડવું. (૨) શરણે જવું; આશરો માગવો.
૧૩૪. પગમાં લોઢાના સળિયા ઘાલ્યા હોવા = ખૂબ રખડપટ્ટી કરી હોવી.
૧૩૫. પગે કમાડ ઠેલવાં-ઠેલવું-વાસવાં-વાસવું = (૧) ઉપરથી સારૂં દેખાડી પોતાનો દાવ ખેંચવો; કોઈ ન જાણે એમ પોતાનું કામ કરી લેવાની યુક્તિ કરવી; પરોક્ષ કાર્ય કરવું; પોતે અલગ રહી કરવાનું હોય તે બીજાની પાસે કરાવવું. (૨) જવાબદારીના કાર્ય પ્રસંગે યુક્તિથી ઠેલો મારવો. (૩) હાથ ન અડાડતાં પગ વડે ઠેલી કમાડ ઉઘાડી કહેવું કે તે એની મેળે ઊઘડી ગયું; કોઈની સમક્ષ નહિ પણ પૂઠ પાછળ તે ન જાણે એમ એવી કૃતિ કરવી કે જેથી તેને નુકસાન થાય.
૧૩૬. પગે કરવું-બેસાડવું = પગના ચાપા ઉપર બાળકને હંગાવવું; ઝાડે ફરાવવું.
૧૩૭. પગે કીડીઓ ચડવી = (૧) અશક્તિ આવવી. (૨) કામ કરવાથી કંટાળવું; કામ કરતાં આળસ થવી; વસમું પડવું.
૧૩૮. પગે ઘૂઘરા બાંધવા = (૧) ઘાઘરી પહેરવી. (૨) નાચ માટે પગમાં ઘૂઘરા પહેરવા. (૩) સ્ત્રી જેવું થવું.
૧૩૯. પગે પગ બાંધીને રાખવું = (૧) બરાબર પોતાની પાસે રાખવું; પોતાથી છૂટા ન પડવા દેવું. (૨) બહુ ચોકસાઈ રાખવી; નજરની બહાર જવા ન દેવું.
૧૪૦. પગે પડવું = (૧) આજીજી કરવી; કરગરવું. (૨) નમવું; લાંબા થઇને પ્રણામ કરવા; પગે લાગવું. (૩) માફી માગવી. (૪) શરણે જવું.
૧૪૧. પગ પનોતી બેસવી = (૧) ખૂબ આવજા થવી; રખડપાટ થવી. (૨) નઠારો દહાડો આવવો.
૧૪૨. પગે પરસેવો ઊતરવો = ખૂબ પરિશ્રમ પડે તેમ થવું.
૧૪૩. પગે પાલી ઠેલવી = (૧) પરબારૂં કામ કરાવવું. (૨) પોતે કામ નહિ કરતાં બીજાને માથે બોજો નાખવો; માથે આવેલું કામ બીજા તરફ હડસેલવું.
૧૪૪. પગે માછલાં મારે અને મોઢે રામ પુકાર = મુખમાં રામ ને બગલમાં છૂરી; મોઢેથી મીઠાશ દેખાડવી અને વર્તનમાં કપટી હોવું.
૧૪૫. પગે માથું મૂકવું = (૧) પગે પડવું. (૨) હારીને શરણ લેવું; નમી પડવું.
૧૪૬. પગે મેંદી કરવી-ચોપડવી-મૂકવી-લગાડવી = બેસી રહેવું; ચાલવાનો કંટાળો હોવો; ચાલવાનું આળસ કરવું.
૧૪૭. પગે મેંદી મૂકી છે ? = ઉતાવળે કેમ ચાલતા નથી ? ચાલતાં કંટાળનારને કટાક્ષમાં પ્રશ્ન કરતાં બોલાય છે.
૧૪૮. પગે લાગવું = (૧) કોઈનાથી કંટાળવું. (૨) પગે કાંઈ ઈજા થવી. (૩) પ્રણામ કરવા. (૪) માફી માગવી. (૫) વરવધૂએ મોટેરાને નમસ્કાર કરવા.
૧૪૯. પગે લાગ્યા = હાર્યા; થાક્યા; કંટાળ્યા.
૧૫૦. પગે હાથ મૂકવો = સોગન ખાવા.
૧૫૧. પેટમાં પગ હોવા = (૧) પહોંચેલું હોવું; ઉપરથી ભોળા અને અંદરથી કપટી હોવું . (૨) સાપની માફક બહુ ઝેરીલા હોવું.
૧૫૨. ભારે પગે = નિરાશાથી.
૧૫૩. સ્ત્રીની બુદ્ધિ પગની પાનીએ = સ્ત્રીજાતિમાં બુદ્ધિ ઓછી હોય છે એવો કટાક્ષ.
૧૫૪. હલકા પગનું = ખરાબ આચરણવાળું; દુરાચારી.