૧. બેઠા કરતાં બેગાર ભલો = આળસુ રહેવા કરતાં કંઈક કરવું સારૂં.
૨. બેઠાની સામે ઊભાનું શું ચાલે ? = સત્તા આગળ શાણપણ નકામું.
૩. બેઠાં ખાધે તો ભંડાર પણ ખૂટે = આવક વગર માત્ર જાવક હોય તો ગમે તેટલો સંઘરો હોય તે પણ ખૂટી જાય; નિરુદ્યમી રહેવાથી પાયમાલ થવાય.
૪. બેઠાં ખાવું = (૧) કામ કર્યા વગર ગુજરાન ચલાવવું. (૨) બેફિકર જીવન જીવવું.
૫. બેઠી ચલાવવી-હાંકવી = ઠંડી મશ્કરી કરવી.
૬. બેઠું પાણી ચલાવવું = (૧) કોઈ ન જાણે એમ અશક્ય બાબતની પણ સિદ્ધિ કર્યે જવી. પહોંચેલા માણસને વિષે બોલતાં વપરાય છે. (૨) પાયા કે આધાર વિનાની ડંફાસ હાંકવી; અફવા ફેલાવવી.

૧. બેઠો ભાવ = (૧) ઘેર બેઠાં મળતો ભાવ. (૨) ટકી રહેલો ભાવ; વધઘટ ન થાય તેવો ભાવ.
૨. બેઠો હાથી = નવી કમાણી વિના, ઘરમાં હોય તેથી જ પૂરૂં કરનારૂં માણસ; ઘરમાં બેઠાં પોતાનું ગુજરાન ચલાવનારો માણસ; કંઈ પણ મહેનત કે ધંધો કર્યા સિવાય ભરણપોષણ કરનાર માણસ.

૧. બેઠા થવું = (૧) અંતકાળ નજીક લાગવા જેવી માંદગીમાંથી બચવું; સાજા થવું. (૨) આડા પડ્યા હોઈએ તેમાંથી ટટ્ટાર થવું; બેસવું. (૩) ઊભા થવું; ઊઠવું. (૪) ફરીને સતેજ થવું.
૨. બેઠું કરવું = (૧) આધાર આપીને ઊભું કરવું; ઉઠાડવું. (૨) મદદ આપી બેસાડવું. (૩) સતેજ કરવું. (૪) સાજું કરવું.

૧. બેઠેલો પોપડો ઉખાડવો = શાંત થયેલો ઝઘડો કે વાત ફરી ઉપાડવી; ફરીને તાજું કરવું.
૨. બેઠો બળવો = શાંત, અહિંસક બળવો.

૧. બેઠું પાણી = શાંત પણ સતત ચાલુ પાણી.
૨. બેઠું પાણી પડવું = ધીમે ધીમે પણ સતત પાણી પડ્યા કરવું.

૧. બેઠી દડીનું-બાંધણીનું = ઊંચું કે દમામદાર નહિ પણ મજબૂત ને ઘાટીલું.
૨. બેઠે ખામણે હોવું = કદમાં બેઠેલું કે ગટું હોવું.

રૂંવાડાં બેઠાં થઈ જવાં = (૧) બહુ ગુસ્સે થવું; ક્રોધમાં આવી જવું. (૨) વાળ ઊભા થઈ જવા.

૧. બેઠું ચડવું = પાણીની કાઢઘાલ કર્યા વિના તેમ જ હલાવ્યા વગર રંધાવું.
૨. બેઠો ભાત = પહેલેથી જ પૂરતું આંધણ મૂકી ઓસાવ્યા વગર રાંધેલ ભાત; ઓસાવ્યા વગરના ભાત.

બેઠાની ડાળ કાપવી = પાગડું તોડી નાખવું; પોતાનું જ આધારસ્થાન તોડવા મથવું; જરૂરિયાતવાળી, પોતાની સ્થિતિ નભતી હોય એવી કે આધારભૂત વસ્તુ ખંડિત કરવી અથવા એવા માણસનો ઉચ્છેદ કરવો.