સિદ્ધહસ્ત ગુજરાતી લેખિકા કાજલ ઓઝા વૈદ્યનો નારીસંબંધોને ઉજાગર કરતાં 44 લેખોનો સંગ્રહ એટલે સર્ચલાઈટ. લાગણીની ભીની ભીની વાતો, તેના ઋજુ-કઠોર ભાવોનું પ્રતિબિંબ, ટીનએજની આકાંક્ષાઓ, બે જનરેશન વચ્ચેની સંવાદિતા અને વિસંવાદિતા, સ્ત્રીપુરુષ સંબંધોની સંવેદનાના  તાર ઝંકૃત કરતી ગુફતેગો, લગ્નેતર સંબંધોની છણાવટ, માતૃત્વ- પિતૃત્વના અગમ ઉંડાણ, સાસુ-વહુના સંબંધો, સાસુ-જમાઈના સંબંધો – એના પર સર્ચલાઈટ ફેંકી વાચકને જકડી રાખે છે, અને વાંચ્યા બાદ સંબંધોની એ વાત વાચકના મનમાં એવી ગુંજે છે કે તેના પોતાના સંબંધોના તાણાવાણા ક્યાંય ગૂંથાઈ કે ગૂંચાઈ ગયા હોય તો તેને ખોલવામાં મદદરૂપ થાય છે.

                 આ સંબંધોની વાતો કેવી હટકે લખાઈ છે એ માટે પુસ્તક્માથી કેટલાક વાક્યો ટાંકુ છું. જેમાં લાગે છે કે લેખિકા વાચકને ટેકનિક આપે છે જીવન જીવવાની, બલ્કે, સુખી થવાની…

• જિંદગી, એક અનન્ય ભેટ છે ઈશ્વરની ! અને માણસને એથીયે મોટી ભેટ મળી છે હાસ્યની…..
• તકલીફનો પણ આનંદ લેતા શીખો… અને તમારી પાસે જે નથી તેની ફરિયાદ કરવાને બદલે તમારી પાસે જે છે એને માટે ઈશ્વરનો આભાર માનો …
• મોટાભાગના લોકો પોતાની જીવનરીતિને આદર્શ મને છે. એમાં સિદ્ધાંતો, એમની માન્યતાઓ અને એમના પૂર્વગ્રહો સૌ માટે ગીતા, બાઇબલ કે કુરાન હોવા જોઈએ.
• જો રોજ રોજ માણસને રીએસ્યોરન્સ આપવું પડે તો એ સંબંધનો અર્થ શું છે ?
• આ ભુલાઈ ગયેલી ઇચ્છાઓ એકબીજા સાથે ન સંતોષાય ત્યારે માણસ બહાર પગ મૂકે છે.
• માણસ સાથેના સંબંધમાં શબ્દો ક્યારેક ફૂલોનું કામ કરે છે…… એ સુગંધ પણ આપે છે અને તાજગી પણ…..

આ પણ વાંચો : કાજલ ઓઝા વૈદ્યના અન્ય પુસ્તકોના પુસ્તક પરિચય

     જીવનના ત્રણે તબ્બકાઓ – શૈશવ, યૌવન અને વાર્ધક્ય–માં સંબંધો કઈ રીતે બદલા છે તેનું સચોટ નિરીક્ષણ અને આલેખન. પ્રત્યેક ક્ષણમાં જીવવું એટલે શું તેનો જવાબ આપે છે સર્ચલાઇટ. ટૂંકમાં, એટલું ચોક્કસ કહી શકાય કે સંબંધોની એવી માર્મિક છણાવટ કે પુસ્તક એકવાર વાંચવાનું શરૂ કરો તો મૂકી ન શકાય !