અમેરિકા આપણા માટે હંમેશા ચર્ચાનો અને વાદવિવાદનો વિષય રહ્યો છે. કેટલાંક લોકો એવું માને છે કે, ‘અમેરિકામાં કાયમ માટે રહેવા મળી જાય તો આ દેશથી છૂટકારો થાય.’ એથી વિરુદ્ધ મત ધરાવનારા એવું માને છે કે, ‘આપણા દેશ જેવો બીજો કોઈ દેશ નથી. લોકો અમેરિકાનો ખોટો મોહ રાખે છે.’ આ બંને વર્ગના લોકો વચ્ચે વાદવિવાદ થતા રહે છે, જેનો કોઈ અંત નથી. પરંતુ જો કોઈ વાચક ‘ડોલર વહુ’ નવલકથા વાંચે તો એને આવા વાદવિવાદમાં પડવાનું મન જ નહિ થાય.

‘ડૉલર વહુ’ નવલકથા પ્રસિદ્ધ લેખિકા સુધા મૂર્તિએ મૂળ કન્નડ ભાષામાં લખી છે, જેનો સુધા મહેતાએ ગુજરાતીમાં અનુવાદ કર્યો છે.

લેખિકાએ પોતાના અનુભવો અને પોતાની નિરીક્ષણવૃત્તિના આધારે આ સુંદર નવલકથાનું સર્જન કર્યું છે, જેમાં એમણે સાદી, સરળ અને સ્પષ્ટ ભાષામાં વિવિધ મુદ્દાઓને આવરી લીઘા છે. દેશમાં હોય ત્યારે અમેરિકાનું આકર્ષણ, ત્યાં ગયા પછી ત્યાંના ન થઈ શકવું, દેશનું વળગણ, દેશની પરિસ્થિતિ વિશે સતત ફરિયાદો, દેશના સગાં પ્રત્યેનો ચાલાકીભર્યો વ્યવહાર, દેશના સગાંનો અમેરિકામાં રહેતાં સગાં પ્રત્યેનો અહોભાવ અને સ્વાર્થ, જે સારું હોય એની કદર ન કરવી અને જે ન મળતું હોય એની પાછળ તડપવું, દરેકનાં પોતાનાં સપનાં અને પોતાની મજબૂરી, અણધાર્યા સંજોગોનો સામનો, સુખદુઃખ, હરખ અને હતાશા… આ બધું જ લેખિકાએ આ નાનકડી નવલકથામાં રજૂ કરી દીધું છે, એ પણ રસપ્રદ રીતે અને સાક્ષીભાવે.

વાચકોને નવલકથાનાં પાત્રો, પ્રસંગો, સંવાદો, વગેરે પરિચિત લાગે એટલા વાસ્તવિક છે. આ નવલકથા એને નાનકડો અભ્યાસગ્રંથ કહી શકાય એવી સશક્ત છે. લેખિકાની શૈલી જ એવી છે કે, વાચકને આખી નવલકથા વાંચ્યા વગર ચાલે જ નહિ. એટલું જ નહિ, એને બીજા લોકોને પણ વંચાવવાનું મન થાય.

આ નવલકથાને વાચકોએ ખૂબ જ પ્રેમથી વાંચી છે, એની ઘણી આવૃત્તિઓ થઈ છે. એના વિવિધ ભાષાઓમાં અનુવાદ થયા છે અને એનું ટેલિવિઝન પર શ્રેણીના રૂપે પણ પ્રસારણ થયું છે.

[પુસ્તક પ્રકાશક: આર.આર.શેઠ કંપની પ્રા. લિમિટેડ]

આ પુસ્તક પરિચય આપનાર યશવંત ઠક્કર દ્વારા રજૂ થતી રમણ રીઢાની ડાયરી વાંચવા અહીં ક્લિક કરો