લીલા જેવા રંગનું એક પક્ષી; શુક

આકડાનું ફળ.

એક જાતનું પતંગિયું.

એક જાતનો કાઠિયાવાડી ઘોડો.

ખોગીરની આગળનું અર્ધચંદ્રાકાર સાધન. તે સવારને આધાર આપે છે.

ઘોડિયા ઉપર રાખવામાં આવતું લાકડાનું પોપટના આકારનું સાધન કે નમૂનો.

જુવારનું ડૂંડું નીકળતી વખતનો મથાળાનો પોચો ભાગ.

પુરુષની જનનેંદ્રિય; શિશ્ન.

મનુષ્યની વાણીની નકલ કરનારૂં એક પક્ષી; લીલા રંગનું, કાળા કાંઠલાનું, વળેલી રાતી ચાંચનું અને જેમ શીખવાડીએ તેમ બોલે એવું પંખી; શુક; કીર; તોતા; સૂડો. પોપટ લગભગ ૬૦૦ જાતના થાય છે. તેની ચાંચ વળેલી, મજબૂત તેમ જ લાંબી અને જીભ માંસદાર હોય છે. તેના પગની પહેલી અને ચોથી આંગળી પાછળ વળાક લે છે અને બીજી તથા ત્રીજી આંગળી આગળ વળાક લે છે.તે ઝાડ ઉપર રહેનારૂં અને ફળ તથા બિયાં ઉપર જીવનારૂં પક્ષી છે. તે હંમેશા સમૂહમાં રહે છે, પરંતુ તેનું જોડું હંમેશા સાથે જ રહે છે. ન્યુઝીલંડ અને તેની આસપાસના ટાપુઓમાં નેસ્ટર નામનો પોપટ થાય છે. તેની ખાસિયત એવી છે કે, ઘેટાંઓનો વાંસો તે તોડી ફાડી નાખે છે અને પછી અંદરનો અમૂલ્ય ભાગ ખાઈ જાય છે. ઓસ્ટ્રેલિઆ અને તેની આસપાસના ટાપુઓમાં જે પોપટ થાય છે, તેમની જીભનાં ટેરવાં ખરબચડાં હોય છે. કાકાકૌઆ નામના પોપટની જીભ સાદી છે અને તેને માથા ઉપર પીંછાની એક કલગી હોય છે. સાચા પોપટની જાતની જીભ તદ્દન સુંવાળી હોય છે, તેને કલગી હોતી નથી અને તેનાં પીંછાં પોપટિયા રંગનાં હોય છે. સાચા પોપટની જાત ખાસ કરીને આશરે ૪૪૦ જેટલી છે. તે જૂની અને નવી બંને દુનિયામાં મળી આવે છે. ઓસ્ટ્રેલિઅનો અને આફ્રિકનો ભૂરો પોપટ તો ખૂબ જ અનુકરણ કરી શકે તેવો અને બહુ જ વાચાળ હોય છે. દક્ષિણ અમેરિકનો પોપટ મોટો લાંબી પૂંછડીવાળો અને કિરમજી, આસમાની, લીલો કે પીળા રંગનો હોય છે. ન્યૂઝીલંડમાં ઘુવડ જેવો પણ પોપટ થાય છે.તેને વિચિત્ર પાંખો હોય છે, પણ તે ઊડી શકતો નથી. પોપટની આયુષ્યમર્યાદા સાઠ વર્ષની મનાય છે. એક સંસ્કૃત કવિએ કહ્યું છે કે, પંખીઓને તેમની મધુર વાણી માટે પાળવામાં આવે છે. જેટલું વધારે સારૂં બોલી શકે તેટલું તે પંખી વધારે વખણાય. તેમાં પણ માણસની પેઠે વિચારપૂર્વક બોલતાં જેને આવડે તેની મહત્તા વધારે. આ દ્રષ્ટિએ પોપટ બધાં પંખીમાં પાલ્ય પંખી ગણાય છે. જૂના વખતથી ગૃહસ્થના ઘરમાં મેના અને પોપટ એ બંને ભૂષણ ગણાતાં આવ્યાં છે. તેમના આવા નિત્ય સહચારને લીધે પોપટ અને મેના શુકસારિકા અથવા વરવધૂ પણ મનાયાં છે. એટલું જ નહિ પણ ક્વચિત્ તો એ પક્ષીયુગલના સ્થૂલ વિવાહનો વિધિ પણ આચરવામાં આવતો દેખાય છે. આજે પણ ભારતવર્ષમાં મેનાપોપટની બેલડી પંજરાવસ્થા ભોગવતી નજરે પડે છે. પોપટ જેવી જ સ્ફૂટ વાચાથી મેના ઘણી વખત બુદ્ધિવાદ વદતી દેખાય છે. ન્યૂયોર્કના સંગ્રહસ્થાનમાં એક મેના હતી. તેને કોઈ ગમે તે કહે તોપણ તે સાંખી લેતી. માત્ર જો તેને કોઈ કાળી કહે તો તરત સામો ઉત્તર મળતો કે તારો બાપ કાળો. આવું આવું તો મેના ઘણું બોલે છે, પણ પોપટ તે પોપટ. તેની તોલે મેના ન આવે. વળી પોપટ જેટલું તે પંખી વ્યાપક પણ નથી. પોપટ કરતાં તેનો કંઠ વધારે શ્રુતિરમ્ય છતાં પોપટના જેટલી તીવ્ર સ્મરણશક્તિ તેને નથી, તેમ જ પોપટ જેટલી સરળતાથી તે શીખી પણ શકતી નથી. પોપટની ડોકની ઉપરની બાજુએ લાલ અને નીચલી બાજુએ કાળી લીટી હોય છે, તેને કાંઠલો કહે છે. ખોરાકમાં તે ધાન્ય, દાળ અને કઠણ ફળ ખાઈ શકે છે. શરીરના પ્રમાણમાં તેની ડોક મોટી હોય છે. બીજાં પક્ષીઓના મુકાબલામાં તે થોડોઘણો બુદ્ધિમાન છે. તેને કોઈ બોલતાં શીખવે તો તે યાદ રાખીને આબેહૂબ બોલે છે. માદા દર વખતે ચાર ઈંડાં મૂકે છે. લોકો હોંશથી તેને પાળે છે. તેને પગે ચાર આંગળાં હોય છે. ઝાડ ઉપર માળા બાંધીને રહે છે.

યોનિ; સ્ત્રીની જનનેંદ્રિય.

લોહાણાની એ નામની એક અટક.

એ નામની અટકનું માણસ.

એ નામની અટકનું.