૧. ફરી જવું = (૧) આડું જવું; અવળા ફંટાવું. (૨) ઉપર થઈને જુવં; ફરી વળવું. (૩) કબજામાં ન રહેવું. (૪) ઘોડીને ગર્ભ ધારણ ન થવો. ઘોડીને ઘોડો બતાવ્યો હોય અને અમુક વખત થયે ગાભ ન દેખાય ત્યારે ઘોડી ફરી ગઈ કહેવાય છે. (૫) નાકબૂલ જવું; વચન તોડવું; બોલ્યું નહિ પળવું; એક વખત કહ્યું હોય તેમાંથી ખસી જવું; ફરી બેસવું. (૬) પૂંઠ ફેરવવી. (૭) બદલાવું; બદલાઈ જવું. (૮) સામા થવું.

૧. પાછું ફરવું = (૧) ઓકાવું; ઊલટી થવી; વમન થવું. (૨) નાસીપાસ થવું; નિષ્ફળ જવું.
૨. ફરી બેસવું = (૧) આડું બોલવું; વાંકું બોલવું. (૨) ઊલટું કરવું. (૩) પાઘડી ફેરવવી; વચનભંગ થવું; કબૂલત તોડવી. (૪) દિશા બદલીને બેસવું. (૫) પક્ષફેર કરવો. (૬) ફરવા જવું; પગ છૂટો કરવાને હવા ખાવા જવું. (૭) ભીખ માગવા જવું. (૮) મરડાવું; પાસું મરડી બેસવું. (૯) મુસાફરીએ જવું. (૧૦) સામા થઈ જવું; વિરુદ્ધ પડવું.

આણ ફરવી = આજ્ઞા ચાલવી; ઢંઢેરો પિટાવો; દુવાઈ ફરવી; હુકમ નીકળવો.

ઘંટીચક્કર-ફૂદડી-ફરવું = વર્તુલાકાર ફરવું.

૧. ફરવું હરવું = (૧) ઘર બહાર કે ગામ બહાર ફરવા જવું; આમતેમ જવું. (૨) મનગમાડા માટે આમતેમ ચાલવું.
૨. ફરે તે ચરે, બાંધ્યો ભૂખે મરે = બહાર પરદેશ નીકળી પડે તે જ પરાક્રમ કરે; બેઠા રહેવાથી કાંઈ વળે નહિ.

મન ફરવું = ન ગોઠવું; મનમાં વ્યાકુળતા થવી.

૧. દી-દિવસ ફરવો = (૧) અવળું સૂઝવું. (૨) પડતી દશા આવવી; બૂરૂં થવા માંડવું. (૩) ભાગ્ય ઊઘડવું.
૨. ફરી વળવું = (૧) આસપાસ, ઉપર બધે થઈ જવું. (૨) ચોગર દમ જઈ આવવું કે પહોંચી જવું. (૩) પથરાઈ જવું; વ્યાપી જવું; વીંટળાઈ જવું. (૪) પહોંચી વળવું; ચારે બાજુનું સઘળું કામકાજ કરી શકાવું. (૫) પૂરા પડવું.
૩. મોં ફરી જવું = (૧) તમાચા પડવા; મોઢા ઉપર માર પડવો. (૨) મોઢા ઉપરની રેખાઓ ફરી જવી.
૪. વિચાર ફરવો = વિચાર બદલાવો.

ફેર ફરવા = (૧) પરણવું. (૨) પ્રદક્ષિણા કરવી; ગોળાકારે આસપાસ ફરવું.

ફરતા ફરવું = (૧) કામકાજ વગર ભટકવું; રઝળતા ફરવું (૨) હરવુંફરવું; આમતેમ જવું આવવું; હાલચાલ કરતા રહેવું.

ફરવા જવું = (૧) ભિક્ષા માગવા જવું. (૨) મુસાફરીએ જવું. (૩) હવા ખાવા જવું; ચાલવાની કસરત કરવા કે બહાર ટહેલવા અથવા હવા ખાવા નીકળવું.

હાથ ફરવો = (૧) ચંપાવું; પંપાળવામાં આવવું. (૨) ઢંઢોળવું; ખંખોળવું; ખાંખાખોળા કરવા. (૩) લૂંટાઈ જવું. (૪) વપરાશમાં હોવું. (૫) વ્યવસ્થાપૂર્વક કામ થવું. (૬) સંભાળ લેવાવી.