બળદ; નંદી. કાનડી ભાષામાં નંદીને બસવ કહે છે. શંકરના વાહન તરીકે દરેક શિવમંદિરમાં તેને અગ્રસ્થાન મળે છે. લિંગાયતોને બસવ નામ બહુ પ્રિય છે.

વીર શૈવ ધર્મના પુનરુદ્ધારક પુરુષ. તેઓ તૈલંગી બ્રાહ્મણ અને કર્ણાટક પ્રદેશમાં વિજાપુર જિલ્લામાં આવેલ બાગેવડી નામના ગામના વતની હતા. તેમના પિતાનું નામ મહાદેવ ભટ્ટ અને માતાનું નામ માદલાંબિકા હતું. તેના પિતાને શંકરે સ્વપ્નમાં આવી કહ્યું હતું કે, હું તારે ત્યાં અવતરીશ. નાનપણથી જ તેઓ કુશાગ્ર બુદ્ધિના હતા અને તેથી નાનપણમાં જ ગૃહત્યાગ કરી વિદ્યાભ્યાસ માટે આશ્રમ શોધવા નીકળ્યા. કૃષ્ણા અને મલપ્રભાના સંગમ ઉપર આવેલ વૃષભધ્વજાંકિત આશ્રમમાં રહી તે વિદ્યાભ્યાસ કરવા લાગ્યા. ત્યાં અઢર વરસ રહી તેમણે શૈવાગમ અધ્યયન, વેદાધ્યયન, શિવાચાર અને શિવવ્રતનું જ્ઞાન પ્રાપ્ત કર્યું. આશ્રમમાંથી વિદ્યા સંપાદન કરી તે પોતાને ગામ આવી પહોંચ્યા. તેમની વિદ્વત્તાની છાપ ચારે બાજુ ફેલાઈ ગઈ. તેમનું લગ્ન કલ્યાણનગરના મંત્રી બલદેવની પુત્રી ગંગાલિકા સાથે થયું હતું. પોતાની વિદ્વત્તાથી તેને કલ્યાણના મુખ્ય મંત્રીની જગ્યા મળી અને ત્યાં રહી તેમણે વીર શૈવ ધર્મનો પુનરુદ્ધાર કર્યો. પોતાના મતના માણસોને શિવલિંગ ગળે બાંધવા તેમણે ફરમાવ્યું. કેટલાક વખત પછી તેમણે કલ્યાણનગરના મુખ્ય મંત્રીપદનો ત્યાગ કર્યો. તે સંગમેશ્વરમાં ઈ. સ. ૧૧૬૮માં મૃત્યુ પામ્યા.