મૂંહ-મોં-ભરવું = (૧) ખાવું; કોળિયો લેવો. (૨) લાંચ આપવી.

૧. ડગલું ભરવું = (૧) પગલું માંડવું. (૨) વિચારીને આગળ ચાલવું.
૨. પગલું ભરવું = (૧) ઇલાજ લેવો; ઉપાય કરવો; કામ લેવું. (૨) ચાલવું; વ્યવહારમાં વર્તવું આચરણ કરવું. (૩) ધીમે ધીમે ભારેખમ રીતે ગંભીરાઈથી ચાલવું. (૪) પગલાં વડે ચાલવું; કદમ મૂકવું; ડગલું પડવું. (૫) પ્રવેશ કરવો; અંદર જવું.

૧. આંખ ભરવી = (૧) આંસુ પાડવાં. (૨) દવા આંખમાં નાખવી. (૩) નિહાળી નિહાળીને જોવું.
૨. રસ ભરવો = (૧) અતિશયોક્તિ કરવી; મીઠું મરચું ભભરાવવું; વધારીને કહેવું કરવું. (૨) કોઈ બાબતમાં રસ કે સ્વાદ રહે તેમ કરવું.

૧. ભરત ભરવું = કપડાં ઉપર રેશમ વગેરેનાં ફૂલવેલ પાડવાં.
૨. વાડી ભરવી = વેણીમાં ફૂલ ગૂંથવાં; ફૂલથી વેણી શણગારવી.

કર ભરવો = કર આપવો.

પાણી ભરવું = (૧) કૂવામાંથી ઘરમાં વાપરવાનું પાણી ખેંચી આવવું; નદીમાંથી પાણી ભરવું. (૨) ના કરતાં ઊતરતા થવું.

ખોળો ભરવો = અઘરણી કરવી; સીમંતનો વિધિ ને તેને લગતો કરિયાવર કરવો.

૧. ખાનું ભરવું = ખાલી આસનમાં આંકડા, હકીકત વગેરે લખી કાઢવાં.
૨. ભરી કાઢવું = (૧) ખાનાં પૂરવાં. (૨) ભરેલું કરી દેવું. (૩) સ્થાપી દેવું; નીમી દેવું.

કાન ભરવા = ભંભેરવું; ચડાવવું; સાચુંખોટું કહી ઉશ્કેરવું.

દોરો ભરવો = સીવવું; સાંધવું.

ટીપમાં ભરવું = ફંડમાં પૈસા નોંધાવવા.

બંદૂક ભરવી = (૧) તૈયાર થઈ રહેવું. (૨) બંદૂકમાં દારૂ ભરવો.

મોટી બાથ ભરવી = (૧) આલિંગન દેવું. (૨) તત્પર થવું. (૩) મોટી ઇચ્છા કરવી; મોટું સાહસ ખેડવું. (૪) સામા થવું.

૧. દિવસ ભરવા = રોજીએ કામ કરવું.
૨. નોકરી ભરવી = નોકરી કરવી.

૧. ખાતું ખાય અને બરતું ભરે = જરૂરિયાત હમેશા પૂરી પડી રહે છે.
૨. ઘર ભરવું = (૧) કોઈનું લૂંટી લાવી કે ઠગીને ઘર ભેગું કરવું. (૨) પૈસાટકાથી ઘરને ભરપૂર કરવું. (૩) વાડી વિસ્તાર વધારવો.
૩. ભરતામાં ભરવું = જ્યાં પુષ્કળ હોય ત્યાં વધારો થયા કરવો; વધારામાં વધારવું.
૪. ભર્યા પેટે સાકર ખાટી = દરકાર વગરનાનો સારૂં યે ખાટું લાગે.
૫. ભર્યું ઘર = સરસામાન, અન્નપાણી અને પૈસેટકે પૂર્ણ ભરેલું ઘર; ભર્યુંભાદર ઘર.
૬. ભર્યું ભાદર = રાચરચીલું અને બીજી વસ્તુથી ભરપૂર.

પેટ ભરવું = (૧) ખાવું; ગુજરાન ચલાવવું. (૨) સ્વાર્થ સાધવો.

૧. ભરણું ભરવું = તિજોરીમાં પૈસા ભરવા.
૨. ભરી આપવું = (૧) કોઈ પાત્ર પ્રવાહીથી ટંકોટંક કરી આપવું. (૨) દાન કે બક્ષિશની ટીપમાં કંઈ નાણું આપવા કબૂલ થવું; ટીપમાં ભરવું. (૩) નુક્સાનીનો બદલો આપવો; મજરે આપવું. (૪) માપી આપવું.
૩. ભરી લેવું = (૧) નુક્સાનનો પૂરો બદલો લેવો; નુક્સાન થયું હોય તે લેવું. (૨) માપી લેવું.

૧. જમીન ભરવી = જમીન માપવી.
૨. ભરી પીવું = (૧) ન ગણવું; ન ગાંઠવું. (૨) પૂરું પડવું; પહોંચી વળવું; સમજી લેવું. (૩) મળી જવું; ઐક્યતા બાંધવી. વિચાર, મૈત્રી વગેરેમાં વપરાય છે. કજિયો પત્યા પછી મેળાપ કરતી વખતે પ્યાલો ભરીને અરસપરસ પાવા પીવાનો રિવાજ છે. (૪) સુખદુ:ખ, નફોનુક્સાન જે થાય તે એકાદ જણે પોતાને માથે લઇ લેવું; ગમે તે પ્રકારે નિકાલ કરવાનું માથે લેવું; મરી ફીટવું.

રંગ ભરવો = (૧) ચીતરવું. (૨) બહલાવવું; ઉત્તેજન આપવું; ખીલવવું. (૩) મરચું મીઠું ભભરાવવું.

બચકું ભરવું = (૧) કરડવું. (૨) સામા થવું; ઘૂરકવું; તરફોડા કરવા; કજિયો કરવો.

વસૂલ ભરવું = હિસાબમાં જમા કરાવવું.

૧. દાણા ભરવા = અનાજનો સંગ્રહ કરવો.
૨. ફસલ ભરવી = આખા વર્ષને માટે જોઇતો સામાન ઘરમાં રાખી મૂકવો.
૩. ભરી આપવું = નુક્સાનીનો બદલો આપવો; મજરે આપવું.
૪. ભરી ઘાલવું = ઠસાવી દેવું.
૫. ભરી દેવું = સંપૂર્ણ ભરવું.
૬. ભરી પીવું = પહોંચી વળવું; સમજી લેવું.
૭. ભરી ભાંગવું = (૧) અભરે ભરવું; ઘણું આપવું. (૨) એટલું બધું ભરવું કે જેથી વાસણ ભાંગવાની તૈયારીમાં આવે.
૮. ભરી મૂકવું = (૧) ગંદું કરવું. (૨) સંચી રાખવું; એકઠું કરવું; સંગ્રહ કરી રાખવો.