૧. મૂછ આવવી-ઊગવી-ફૂટવી = (૧) છોકરાનું જુવાનીમાં આવવું. (૨) છોકરાના ઉપલા હોઠ ઉપર મૂછના વાળ ઊગવા.
૨. મૂછ ઊંચી કરવી = હુંપદ દર્શાવવી.
૩. મૂછ ઊંચી રહેવી = ટેક આબરૂ સાચવવાં.
૪. મૂછ ઊંચી રાખવી = આબરૂમાં રહેવું; ટેક જાળવી રાખવી; નીચાજોણું ન થાય તેવું વર્તન રાખવું.
૫. . મૂછ ચડાવવી = (૧) બડાઈ કરવી. (૨) મૂછે તા દેવો; પોતાની વીરતા બતાવવી.
૬. મૂછ નીચી કરવી = (૧) નમી જવું. (૨) મિજાજ ગળી જવો; નમવું.
૭. મૂછ નીચી થઈ જવી = શોભા કે આબરૂ ઓછી થઈ જવી; નીચાજોણું થવું.
૮. મૂછ પર લીંબુ ઠરાવવાં-નચાવવાં-રાખવાં = (૧) મૂછનો આંકડો નમવા ન દેવો. (૨) વરણાગિયા થવું. ઈશ્કી અથવા ગર્વિષ્ઠ માણસને વિષે બોલતાં વપરાય છે.
૯. મૂછ પર લીબું લટકવું-હોવું = ઈજ્જત આબરૂ સારી હોવી.
૧૦. મૂછ પર હાથ દેવો = મૂછે હાથ દેવો.
૧૧. મૂછ પહેલો માંડવો = પુરુષનું નાની ઉમરમાં કન્યાના બાપ થવું.
૧૨. મૂછ મરડવી = (૧) અભિમાન ધરવું; મૂછના આંકડા વાળવા; કોઈની સામે મરદાની બતાવવાને અથવા મગરૂરીમાં મૂછ વાળવી. (૨) કરડાગી કરવી. (૩) શૂરાતન બતાવવું.
૧૩. મૂછ મુંડાવવી = નામર્દી સ્વીકારવી.
૧૪. મૂછના આંકડા વાળવા = ફાંકડા દેખાવાને અથવા કોઈની સામે મરદાની બતાવવાને મૂછના વાળ ઊભા રહે તેમ આમળવા; મૂછો છેડેથી વાંકી કરવી; મૂછ પર તાવ દેવો.
૧૫. મૂછનાં લીંબુ સોંઘાં થવાં = પોતાની કીમત ઘટવી.
૧૬. મૂછનું પાણી = ઈજ્જત; આબરૂ; ટેક.
૧૭. મૂછનો આંકડો નમવા ન દેવો = ગર્વ રાખવો; મૂછ ઊંચી ને ઊંચી રાખવી.
૧૮. મૂછનો દોરો દેખાવો = જુવાની આવવી.
૧૯. મૂછનો દોરો ફૂટ્યો ન હોવો = મૂછો ઊગી ન હોવી; બહુ નાની ઉંમર હોવી.
૨૦. મૂછનો બાલ-વાળ=(૧) કીમતી ચીજ; (૨) માનીતો માણસ; ઘણો જ પ્યારો માણસ.. (૩) મરદને મૂછના વાળ જેવું પ્રિય હોય તે.
૨૧. મૂછમાં હસવું =(૧) મનમાં રાજી થવું. (૨) મંદહાસ્ય કરવું; સ્મિત કરવું; મોં મલકાવવું.
૨૨. મૂછે તા-તાલ-તાવ દેવો = (૧) પોતાની વીરતા બતાવવી; મગરૂરીમાં મૂછના વાળ ઊંચા ચડાવવા. (૨) બડાઈ મારવી.
૨૩. મૂછે હાથ દેવો-ફેરવવો = (૧) ફાંકડાઈ કે મર્દાઈ દેખાડવા મૂછના વાળ પર આંગળીઓને ફેરવવી. (૨) બડાઈ કરવી.