( સંગીત ) સંગીત કાવ્ય; ઊર્મિ કાવ્ય; ગાયન કવિતા; ગીત કવિતા; ભાવપ્રધાન કાવ્ય. નરસિંહરાવે પોતાના કાવ્યોને સંગીત કાવ્યો એ નામ આપ્યું છે. સંગીત કાવ્ય એવો એમણે અંગ્રેજી `લિરિક`નો અર્થ કર્યો છે. હૃદય પરની અસરથી પ્રેરાયલી, અંતર્ભાવદર્શક એ અર્થ આ ગ્રંથોના લક્ષણમાં વિશેષ ઇચ્છેલો છે. અસલના વખતમાં કવિઓ પોતાના ભાવ સંગીતમાં દર્શાવતા અને ગાયનની જેમ કવિતા હૃદયમાંથી નીકળી આવે છે એનો આભાસ સંગીત શબ્દથી થાય છે. પણ એ આભાસ ઝાંખો અને તે એ સૂક્ષ્મદૃષ્ટિએ વિચારવાથી જ થાય છે. સંગીત કરતાં એ અર્થ માટે વધારે યોગ્ય શબ્દ રાગ છે. સંગીતના અર્થની સાથે આ શબ્દ હૃદયના ભાવ એ અર્થનો પણ વાચક છે. `લિરિક ની માફક કાંઈક શ્લેષથી અને કાંઈક સ્વભાવથી, વસ્તુ સ્થિતિથી રાગ શબ્દમાં હૃદય પર અસર આટલું ગર્ભિત છે માટે જ તેના બે અર્થ થાય છે. તેથી `લિરિક` શબ્દનો અર્થ રાગધ્વનિ કાવ્ય આ શબ્દથી સારી રીતે સમજાશે. રાગ કે હૃદયભાવનું જ આવિષ્કરણ રાગધ્વનિ નામના કાવ્યમાં આવે એ વાત સ્પષ્ટ થશે વૈયાકરણો ઉપરથી અલંકારિકોએ ધ્વનિ શબ્દ લીધો છે તેમ એ શબ્દ લેવાથી અવાચ્ય રાગરૂપી સ્ફોટનો કંઈક અંશે ધ્વનિ-આ અર્થ યથાયોગ્ય થશે. વળી સંસ્કૃત સાહિત્યમાં ઉત્તમ કાવ્યને ધ્વનિ નામ આપ્યું છે તેની સાથે વિરોધ ન આવતાં `લિરિક`તે પણ ઉત્તમ કાવ્ય કે ધ્વનિ કાવ્ય છે એ બતાવવું સહેલું પડશે. આ કારણો માટે સંગીત કાવ્ય કરતાં રાગધ્વનિ કાવ્ય એ વધારે યોગ્ય પદ કહી શકાય.