ઢોરને લીલું નાખવું = ઢોરને ચરવા માટે લીલો ચારો નાખવો.

૧. લીલા ખેતરમાં કે ઝાડ તળે ભૂખે મરે તેવું = (૧) અતિશય શરમાળ હોય તેવું. (૨) આળસુ; અકુશળ; હરામ હાડકાંનું; આવડત કે હોશિયારી વગરનું; ભોટ; મૂર્ખ. (૩) તળાવે જઈને તરસ્યું આવે તેવું; છતી વસ્તુએ તંગી ભોગવે તેવું; અચતુર; સહજ મળી શકે એવું હોય તે પણ મેળવી ન શકે એવું; ભોળું; નિર્બળ.
૨. લીલા ઝાડા = બાળકનો એક રોગ; લીલા રંગનો દસ્ત વારંવાર થવો તે.
૩. લીલા વનના સૂડા ઘણા = પૈસો હોય તો મિત્રોનો તોટો નહિ.
૪. લીલી લેખણ = (૧) તાજું લખાણ. (૨) તાજો કારભાર. (૩) ધીકતી પેઢી; ધમધોકાર ચાલતો વેપારધંધો. શરાફ કે મોટા વેપારીને રોજમેળ ને ખડિયા લેખણ સિવાય ચાલતું નથી. વારંવાર જમે ઉધારની રકમ નખાવવા લોકોની પડાપડી થાય છે અને તેથી વેપારીની કે લખનારની લેખણ લીલી ને લીલી જ રહે છે, સૂકાતી નથી તે ઉપરથી એમ કહેવાય છે.
૫. લીલી વાડી = (૧) જુવાની; ખીલતી-તરુણ અવસ્થા. (૨) છેયાં છોકરાંનો વિસ્તાર.
૬. લીલું કરવું = (૧) કાંઈ નવું જૂનું કરવું; ઉકાળવું. (૨) ફાયદો કરવો; સંપત્તિ મેળવવી; લીલી વસ્તુ રસકસવાળી અને ઉપયોગી થાય એવી હોય છે તે ઉપરથી. (૩) સારું કરવું; કલ્યાણ કે ઉદય કરવો.
૭. લીલું ઘડપણ ભોગવવું = ઘડપણ છતાં જુવાન જુવાન જેવો આનંદ કરવો કે હોવો. જ્યારે ઘરડો માણસ આનંદી અને સુખી હોય અને જુવાન પુરુષોની સાથે હરીફાઈ કરી શકે એવો હોય ત્યારે તેને વિષે બોલતાં એમ વપરાય છે કે, તે લીલું ઘડપણ ભોગવે છે.
૮. લીલું નાળિયેર આપવું = દેવને ઘેટાનું કે બકરાનું બલિદાન આપવું.
૯. લીલું વાળવું = ફાયદો કરી આપવો; સારું કરવું; લીલું કરવું; કાંઈ સારું ન કર્યું હોય ત્યારે નિષ્ફળ નીવડ્યું તેમ વાંકામાં બોલાય છે.
૧૦. લીલે તોરણે = જેમ આવ્યા તેમ ને તેમ; નિષ્ફળતાની સાથે; વીલે મોઢે; કાર્યની સિદ્ધિ થયા વગર; એમ ને એમ; વગર પરણે. કન્યાને પરણવા આવેલો વર પરણ્યા વિના પાછો જાય ત્યારે તે લીલે તોરણે પાછો ગયો એમ કહેવાય છે.
૧૧. લીલો બાંધી આપવો = લીલાનો કટકો બાંધી ગાયનું દાન કરવું; મફત આપવા જોગ હોવું.

લીલું થવું = (૧) તાજામાજા થવું. (૨) નીપજાવવું. (૩) સગર્ભા થવું. (૪) હરિયાળું થવું.