માનવમૂલ્યોમાં રહેલી સંવેદનાને સ્પર્શતી અને ભીતરમાં રહેલી કરુણતાને ઉજાગર કરતી આ કૃતિ ખૂબ જ હૃદયસ્પર્શી છે. અસહ્યય પીડાઓ અને મનોવ્યથાઓ વચ્ચે અલગ અલગ બીમારીમાં સપડાયેલા દર્દી અને તેના ડૉક્ટર વચ્ચેના સંબંધો, લાગણીઓ, વ્યવહાર, યાતનાઓ અને આ બધાની વચ્ચે કરુણતા દાખવી સારવારની સાથે સાથે સ્વજન સરીખું પોતીકાપણું જે પ્રગટ થાય છે તે આ કૃતિમાં વાચકની આંખ અને હૈયા બંને ભીંજવે છે.

      સજ્જ, શિક્ષિત અને નિષ્ણાંત ડૉક્ટરનું કર્મ અને ધર્મ અહીં રજૂ થયું છે. ફરજની પેલે પાર શ્રદ્ધા થકી એ સામાન્ય જિંદગી જીવતા દર્દીની જિંદગીમાં અજવાળું પાથરી શકે. પોતાના અનુભવ અને જ્ઞાનને કેવળ પોતાના લાભાર્થે પોતાની સીમા સુધી જ મર્યાદિત ન રાખતાં એને માનવસેવા માટે આદરે છે અને પ્રકાશ પાથરે છે એવી સંવેદનશીલ વાત લેખકે અહીં રજૂ કરી છે જે સત્યઘટનાઓ પર આધારિત છે.

     ‘આંસુ ભીના અક્ષર’ એ લેખક ડૉ. શરદ ઠાકરની પ્રસિદ્ધ કટાર ‘ડૉક્ટરની ડાયરી’ના ચૂંટેલા લેખોનો સંગ્રહ છે. જેમાં ડૉક્ટર અને દરદીની વચ્ચે પાંગરતી સંવેદનાની કડી છે. જેનું ગૂર્જર ગ્રંથરત્ન કાર્યાલયે પ્રકાશન કર્યું છે. આ સંગ્રહમાં લખાયેલ વાતના અક્ષરોના ભાવ અને મર્મ સુધી પહોચતા વાંચકની આંખોમાં ઝળઝળિયાં સહ સ્મિત રેલાશે અને અંતરમાં સાત્ત્વિક દીવો ઉજાગર થશે. તેથી આ કૃતિનું શીર્ષક ‘આંસુ ભીના અક્ષર’ યથાર્થ ઠરે છે.