કરવડાને એક જ આંધળું ને ચાળણીને બોંતેર આંધળા. – લોકોક્તિ.

૧. અંધાકી જોરૂં ખુદા રખવાલ = આંધળો દેખે નહિ માટે તેનું રક્ષણ કરનાર પરમેશ્વર છે.
૨. આંધળા આગળ આરસી ને બહેરા આગળ શંખ = ભેંસ આગળ ભાગવત. આંધળા માણસને અરીસો તદ્દન નકામો છે તેમ બહેરાને સાંભળી ન શકે એટલે શંખ નકામો છે. તેવી રીતે કોઈ માણસ જે વસ્તુનો લાભ લઈ ન શકે તેને એ વસ્તુ અપાય ત્યારે આ પ્રયોગ વપરાય છે.
૩. આંધળા આગળે દીવો = ઉપયોગમાં ન લઈ શકાય અથવા સમજી ન શકાય એવી ચીજ કોઈ પાસે હોવી; ભેંસ આગળ ભાગવત. આંધળા આગળ દીવો કંઈ કામનો હોતો નથી.
૪. આંધળા આગળ રોઈ ને પોતાની આંખો ખોઈ = કદર ન કરનાર માણસ આગળ પોતાની હકીકત જણાવવાથી લોભને બદલે ઊલટું નુકસાન થાય
૫. આંધળા ખરચનું અંતકાળે સરવાયું = બહુ જ ઉડાઉ માણસ છેવટે દીવાળું કાઢે.
૬. આંધળા ચોરે ચાંદરડું દીઠું = તદ્દન જૂંઠું; ખોટેખોટું; ગપેગપ.
૭. આંધળા પાટા બાંધવા = ભરમાવવું; ભોળવી નાખવું; કાંઈ સૂઝવા ન દેવું.
૮. આંધળા સાથે છિનાળું ને ઘર સુધી વળાવું = નબળા સાથે દોસ્તી કરવાથી પોતા પણ તેવા જ ગણાય; ગધેડે ચડી ઘેર ઊતરવું
૯. આંધળાના પૈસા કૂતરાં ખાય અને પાપીનો માલ અકારત જાય = ચોરીનો માલ ચંડાળે જાય.
૧૦. આંધળાના હાથમાં આરસી = જેને જેનો ઉપયોગ નથી તેને તે વસ્તુ નકામી છે.
૧૧. આંધળાની આંખ = (૧) એકનો એક મોંજોયો લાડકવાયો દીકરો. (૨) ઘણી અગત્યની વસ્તુ. (૩) ઘણું વહાલું. (૪) બહુ ઉપયોગનું.
૧૨. આંધળાની એક આંખ = (૧) કોઈનુ માત્ર એકનું એક સંતાન. (૨) ઘણી વહાલી હોય તેવી તેની ચીજ. (૩) વાસનાથી અંધ બનેલો માણસ પોતાની પ્રિયા સિવાય બીજું દેખતો નથી.
૧૩. આંધળાની ગત આંધળાઓ જ જાણે = આંધળા માણસને કેટલું દુ:ખ ભોગવવું પડે છે એ તો જેણે એ દુ:ખ સહન કર્યું હોય તે જ જાણી શકે.
૧૪. આંધળાની ગાય ને અલ્લાનાં રખોપાં = નબળાંને ઈશ્વરનો આધાર હોય છે.
૧૫. આંધળાને આરસી ને બહેરાને શંખ = નકામી વસ્તુ
૧૬. આંધળાને આંધળો કહે કડવું લાગે વેણ; ધીરે ધીરે પૂછીએ, શાથી ખોયાં નેણ = કંઈ પણ બાતમી ધીમે વાત કરવાથી મળી શકે, જોરથી કે અવિવેકથી ન મળે.
૧૭. આંધળાને સૂઝે એવું = (૧) ખુલ્લું; ઉઘાડું. (૨) બહુ સ્પષ્ટ; ચોખ્ખું; ખાંચખૂંચ વિનાનું.
૧૮. આંધળાને હૈયાકૂટો મળવો = આંધળે બહેરૂં કુટાવું; દુબળી ગાયને બગા ઘણી.
૧૯. આંધળામાં કાણો રાજીઓ = ઉજ્જડ ગામમાં એરડો પ્રધાન.
૨૦. આંધળા આંતર ભરવાં = હરખ વગર ખાવું; પેટને ભાડું દેવું.
૨૧. આંધળી ભેંસે મોઢવું દીઠું = આંધળી ભેંસને જો એક વખત છાણાં કે ઘાસનો ઢગલો ક્યાં છે તેની ખબર પડી જાય તો પછી વારંવાર તે ત્યાં જ મોઢું નાખ્યા કરે; લાંબી નજર ન હોય તેને ભોગજોગે એકાદ વસ્તુ હાથ આવી તો તે તેનો જ ઉપયોગ કરે.
૨૨. આંધળીને પાથરતાં વહાણું વાય = અજાણ્યા માણસથી એકદમ કામ ઊકલે નહિ.
૨૩. આંધળું ખરચ = વગર વિચાર્યે ખરચાતો પૈસો.
૨૪. આંધળું ખરચ તેનું છેવટ દીવાળું = વગર વિચારે ખરચ કરનારને છેવટે દીવાળું કાઢવાનો વખત આવે.
૨૫. આંધળે બહેરૂં કુટાવું = આંધળો અને બહેરો ગમે તેટલી માથાકૂટ કરે તોપણ એકબીજાને સમજી શકતા નથી અને તેનું કંઈ પણ પરિણામ આવતું નથી; ગેરસમજ થવી; ભુલભુલામણી થવી.
૨૬. આંધળે બહેરૂં કૂટવું = આંધળો અને બહેરો ભેગા થાય તો એકબીજા વાત કરવા અને વિચારની આપલે કરવામાં ગમે તેટલી માથાકૂટ કરે તોપણ સમજી શકતા નથી. કરવાનું હોય તેના કરતાં ઊંધું કરવું.
૨૭. આંધળો આંખને શુ કામ રૂએ ? = થયું ન થયું થતું નથી.
૨૮. આંધળો કહે ભાઈ ચોર આવ્યા, તો નાગો કહે મને લૂટી લેશે = અસંભવિત વાત. આંધળો દેખી શકે નહિ અને નાગાને લૂટાવાપણું હોય નહિ.
૨૯. આંધળો કહે ભીંત અને બહેરો કહે મસીદ = એક ચીજને આંધળો માણસ ભીંત કહે. તેની તે જ ચીજને બહેરો માણસ સમજ્યા વિના મસીદ કહે. સમજ્યા વિના થતી વાત.
૩૦. આંધળો દળે કે ગાય = આંધળો દેખા નહિ જેથી તેનાથી બીજું કામ ન થઈ શકે.
૩૧. આંધળો વણે ને વાછડો ચાવે = મહેનત નકામી જાય એવું કામ.