બિલાડાની માદા કે કોઈ બિલાડું (2) કૂવામાં પડેલું વાસણ કાઢવાનું આંકડાવાળું એક સાધન (3) વહાણનું લંગર

ચોપગું વાઘની જાતનું નાનું પ્રાણી; વાઘની માશી; મીનડી; મીની; માંજરી. ઘણું કરીને બધા દેશોમાં બિલાડી જોવામાં આવે છે. તેનો આકાર કૂતરાથી નાનો, મોઢું ગોળ, નાકની બંને બાજુ સીધા તાર જેવા વાળ હોય છે, જેને મૂછ કહે છે. તેનો રંગ કાળો, ધોળો, પીળો, રતાશ ઉપર તથા મિશ્ર, બદામી અને કાબરચીતરો હોય છે. તેનાં રૂંવાડાં મુલાયમ હોય છે. તેના ડોળા રાતના ચળકે છે. તેની લંબાઈ એક હાથથી ઓછી અને તેની પૂછડી દોઢ બે વેંતની હોય છે. ખોરાકમાં તે માંસ તથા અન્ન ખાય છે. ગર્ભાધાનથી ત્રણ મહિને તે વિવાય છે અને દર વખતે પાંચ છ બચ્ચાં અવતરે છે. જન્મ વખતે બચ્ચાં આંધળાં હોય છે અને ત્રણ ચાર દિવસ પછી આંખો ઊઘડે છે. તેના ઉપર માયા કરવાથી તે બહુ પ્રેમ બતાવે છે. તે ઉંદરને મારી નાખે છે. બિલાડીની આયુમર્યાદા ૧૩ વરસની મનાય છે. તેની જાતનાં બીજાં પશુઓમાં જે લક્ષણ છે, તે બધાં બિલાડીમાં પણ છે. જેમકે, તે પોતાના નખ છુપાવી રાખે છે, પરંતુ કોઈ ઉપર આક્રમણ કે હુમલો કરતી વખતે તે બહાર કાઢે છે. આંખની કીકી વત્તી ઓછી કરે છે. માથું નીચું નમતું હોય છે. જરા પણ અવાજ કર્યા વગર શિકાર ઉપર તૂટી પડે છે. કૂતરાની જેમ તેની ઘ્રાણેંદ્રિય પણ બહુ જ સતેજ હોય છે, તેથી તે પદાર્થોને ઘણે દૂરથી સૂંઘી લે છે. હિંદુસ્તાનમાં બિલાડીના બે ભેદ છેઃ એક જંગલી અને બીજી પાળેલી. વાસ્તવમાં બંને જાતની બિલાડીઓ વસતીમાં અને તેની આસપાસ મળી આવે છે. જંગલી બિલાડીનો રંગ સ્વાભાવિક રીતે કાંઈક ભૂરો કાબરચીતરો અને તે પાળેલી બિલાડી કરતાં વધારે ક્રૂર અને બળવાન હોય છે. પાળેલી બિલાડીઓમાં અંગોરા કે પારસી બિલાડી ઘણી સારી માનવામાં આવે છે. તે શરીરમાં મોટી અને તેના ઉપર ઘણાં મોટાં અને મુલાયમ રૂંવાડાં હોય છે. બિલાડી ઘણા સમયથી મનુષ્યોની વચ્ચે રહેતી આવી છે. રામાયણ, મનુસ્મૃતિ, અષ્ટાધ્યાયી એ બધાંમાં બિલાડીનો ઉલ્લેખ મળી આવે છે. મનુસ્મૃતિમાં બિલાડીનું એઠું ખાવાનું નિષેધ કરેલ છે. સૌથી પહેલાં બિલાડી ક્યાં પાળવામાં આવી તે સંબંધમાં કેટલાક લોકોનું અનુમાન છે કે, સૌથી પહેલાં મિસરવાસીઓએ બિલાડીને પાળી, કારણ કે મિસરમાં જે રીતે દવામાં બોળેલી મનુષ્યની લાશો મળી આવે છે તે જ રીતે બિલાડીની પણ મળી આવે છે. મિસરવાસીઓ જેવી રીતે મનુષ્યોનાં શબ મસાલાથી સુરક્ષિત રાખતા, તેવી રીતે પાળેલાં જાનવરોનાં પણ રાખતા.

લંગર; નાંગર; વહાણ ચાલતું અટકાવવાનું એક સાધન; રોહીલી.

લોઢાનો ઊલટસૂલટ આંકડાનો ગુચ્છ; કૂવા કે તળાવમાં પડેલી ચીજ કાઢવાની અંકોડી; કૂવામાં પડેલું વાસણ કાઢવાનું આંકડાવાળું સાધન.