સહકારથી ચાલતું મંડળ; વેપારનો માલ ઉત્પન્ન કરવાને અગર તે વેચાતો લઈ ને પોતાના ભાગીદારોમાં વપરાશને માટે વહેંચવાને અગર એ ભાગીદારોમાં મૂડી ધીરવા કે તેમની પાસેથી ઊછીતી લેવાને પંત્યાળુ કરનારી વેપારી કંપનીના ધોરણ પર સ્થાપેલી સહાયક મંડળી. અર્થશાસ્ત્રની પરિભાષામાં લખે છે કે, જે મંડળો તેના સભાસદોના હિતને માટે સહકારી ધોરણે વેચાણ, પેદાશ, નાણાંની ધીરધાર અથવા એવું સભાસદોના સામાન્ય હિતને લગતું કાર્ય કરે છે તેમને સહકારી મંડળો કહે છે. અમેરિકામાં સહકારી પ્રવૃત્તિનો ખૂબ સંગીન વિકાસ થોય છે. ત્યાં એક કરોડ કુંટુંબો કે એથી વધુ સહકારી મંડળીઓના સભ્યો છે. દેશના કુલ ખેડૂતોમાંથી અર્ધા કરતાં વધુ પોતાની નીપજ વેચવા અને જરૂરિયાતો ખરીદવા માટે સહકારી મંડળીઓના ઉપયોગ કરે છે. દૂધ, કપાસ, ઊન, ચોખા વગેરેની નીપજ, વેચાણ વગેરે ઘણાં ખરાં સહકારી મંડળીઓ દ્વારા થાય છે. ત્યાં ચાર હજારથી વધુ સહકારી સિંચાઈ મંડળીઓ દ્વારા જલસિંચનના ચાલીસ ટકા પૂરા પડે છે. સહકારી ખેતી વીમાંકંપનીઓ કરકસરથી વહીવટ ચલાવીને બહુ ઓછે દરે વીમાનું રક્ષણ આપે છે. ખેતી વીમાકંપનીઓએ વીસ અબજ ડોલરના વીમા ઉતારેલા છે સહકારી મંડળીઓના પ્રતાપે ખેડૂતોને તેમની નીપજના ભાવ વધુ સારા આવે છે અને તેમની જરૂરિયાતો સસ્તે ભાવે ખરીદી શકે છે.